نسيت
أو تناسيت
أن أقول لكم
أو أن أخبركم
أننى فى تلك الفترة
بامتحن امتحانات الماستر
و عشان اخلى البساط أحمدى
فأنا بقى هاقولكم سر رهيب
انى عندى امتحان فلويد بكرة
بالإنجليزى
FLUID
المهم ايه بقى
عيل و رجعت للإمتحانات
الحمد لله تسعة و عشرين سنة و لسه بامتحن
أجمل حاجة فى الإمتحانات
الرجوع للكلية
و طبعا الفرجة على الكابلس فى شارع الزيزفون اللى عندنا فى هندسة المطرية
أجمل حاجة كمان
انى بكتشف مدى الضلما اللى عايش فيها فى الشغل
أصل إمتحاناتنا من واحدة لأربعة
المهم ايه
بلاقى شمس جميلة جدا
و شجر
و هوا
و شباب بيهرج
و بنانيت مكسوفة
بيركبنى عفريت الهزار
افضل امسك فى زمايلى اللى معايا
اهرج معاهم و احدف نفسى عليهم
تعالوا بقى معايا الشغل
و نشوف الفرق
“كده الشغل هيشوف اللى انا كاتبه هيمسكونى يقطعونى”
المهم يعنى
أخبط خبطتى المعتادة
يفتحلى جابر أو عوض
جابر سايب دقنه
و ناكش شعره
و يقولى ازيك يا بشمهندس
أدخل من الباب
لمكتبنا العامر الخمسمية متر مربع
ياربى عايز مترين فى اوبن اير
انا مش عايز الكتمة دى
المهم أدخل
الاقى الناس وشوشها فى اللابتوب
تجيلى دايما فكرة العالم فى خمستاشر بوصة
و أقعد أبص عليهم مش مصدق ان ممكن احنا و احنا قاعدين فى المكتب كده
شرذمه من المطورين
نقدر نعمل حاجة مفيدة
استحضر كلام هانى و عابد عن باترونات البرمجة
والاقيها مش نافعة خالص فى انها تأكل عيش
و حبيبى أحمد الملط
و نظرياته اللا نهائية فى ضرورة وضع منظومة لنظام البرمجة فى إطار ضيق لا نسمح فيه ان اى نقطة من مجهود أى حد تروح هدر
يا نهار اسوح
المهم ايه بقى
المكتب بافضل قاعد فيه من اتناشر لغاية تسعة بالليل
لا شمس
و لا هوا
مع اننا على النيل
اسما بس
العربيات تحت فى الشارع أجارك الله
فطبعا لازم نقفل الشباك
و طبعا لكم أن تتصوروا ان أكبر مشاكلنا فى المكتب
مين هندبسه عشان يطلبلنا الأكل دليفرى
و يستتبعه قائمة بأحسن المطاعم
و يمكن تاخدنا الجلالة و نتكلم عن صولاتنا و جولاتنا فى دنيا المطاعم الراقية الغير متوفرة فى مصر أصلا
و طبعا صاحبكم اللى هوا أنا
و اللى متبنى نظرية البلدى يوكل
لازم اكلمهم عن عربيات الكبدة و جمالها
و طبعا هما يتريأوا عليا
و يقولوا لحم كلاب
قال يعنى بقية المطاعم لحم نعام
بلا وكسة 🙂
المهم ندبس زميلة مسكينة لينا مش هقول اسمها
تروح تتصل و تدفع
و تلم الفلوس
انا لو منها آخد عمولة
انا طبعا باوفر و بجيب جبنة بيضا
و أقضيها
بس بيضغطوا عليا فى كثير من الأحيان
و باضطر انى أمارس الأكل معاهم من المطاعم دى 🙂
وا إن ذا إند اوف ذا داى
in the end of the day
مافيش
الساعة تسعة
المشروع ما خلصشى
مهدودين من كتر الرغى
ننزل نروح
آجى المكتب فى الضلما
و أروح من المكتب فى الضلما
سحقا يعنى
بس الصراحة ليهم شوية أفكار حلوة
و كلها أفكار تقدر تعملها تصنيف تحت مصنف
“أفكار الغرفة المغلقة”
اصل انا عندى تصنيفين للأفكار
أفكار مغلقة
و أفكار منفتحة
In Box
Out Box
اللى جوه الصندوق دى عبارة عن الأفكار الى لا يتم عملها إلا فى ظروف صعبة
و اللى برة الصندوق دى الأفكار اللى ما تتعملشى
حاجة نكد
أرجع للكلية بقى
الكلية جامدة جدا
و أصلا انا كنت مقضيها بالطول و العرض
كنت باغنى فى كورال الجامعة
و رحت معاهم اسبوع الشباب مرتين
و مسرح سيد درويش
و كنت مقضيها أم كلثوم
و كنت فى الكلية
لما تيجى المحاضرة
أطلع انا وصاحبى من المدرج
و الناس تحذرنا و تقولنا الدكتورة هتاخد غياب
و احنا نحلقلهم برضه
للى عارفين هندسة المطرية
عارفين طبعا مبنى عمارة
و قسم عمارة لمن لا يعرف
هو قسم المزز
اصل البنانيت عندنا كانوا دايما يروحوا عمارة
و الرجاجيل اللى زيى كان أغلبهم ميكاكنيكية و مقشفين
بس كان فيه شوية مننا راقى كده و حليوه و عاقل
لابد علطول فى المبنى هناك
ما علينا
ربنا يسهلهم
—————-
ياااااااااااه
ايه الذكريات العيالى دى
كفاية كده عشان أذاكر
المرة الجاية هحكيلكم عن الفرق بينى دلوقتى و بينى زمان
يمكن الله أعلم
سلاموووووز